Manfaatlar to‘qnashuvini boshqarish bo‘yicha seminar-trening o‘tkazildi

“Turizm xizmatlarini sertifikatlashtirish markazi” DM xodimlari uchun “Manfaatlar to‘qnashuvini boshqarish: tushunchalari, turlari, boshqarish tamoyillari va hal etish yondashuvlari” mavzusida seminar-trening tashkil etildi.

Tadbir davomida ishtirokchilarga manfaatlar to‘qnashuvining mazmun-mohiyati, turlari, namoyon bo‘lish shakllari hamda uning yuzaga kelishiga sabab bo‘luvchi odatiy holatlar haqida batafsil ma’lumot berildi. Shuningdek, manfaatlar to‘qnashuvini o‘z vaqtida aniqlash, uning oldini olish va tartibga solish mexanizmlari, mazkur yo‘nalishdagi qonunchilikdagi dolzarb o‘zgarishlar hamda komplayens-nazorat xizmatining asosiy vazifalari xususida tushunchalar berildi.

Seminar-treningda manfaatlar to‘qnashuvi aniqlangan holatlarda qo‘llanilishi mumkin bo‘lgan javobgarlik choralari ham atroflicha muhokama qilinib, ishtirokchilar o‘zlarining nazariy bilimlarini amaliy mashg‘ulotlar orqali mustahkamladilar. Xususan, manfaatlar to‘qnashuvi yuzaga kelishi mumkin bo‘lgan turli vaziyatli keyslar tahlil qilinib, ularni to‘g‘ri baholash va tegishli choralarni ko‘rish bo‘yicha amaliy yondashuvlar ko‘rib chiqildi.

Mazkur seminar-trening xodimlarning manfaatlar to‘qnashuvini oldini olish va boshqarish borasidagi bilim va ko‘nikmalarini oshirish, xizmat faoliyatida qonuniylik, xolislik va shaffoflik tamoyillarini mustahkamlashga xizmat qildi. Tizim xodimlarining kasbiy malakasi va kompetensiyasini yanada oshirishga qaratilgan bunday o‘quv tadbirlari kelgusida ham muntazam ravishda davom ettiriladi.