Toshkentda bo‘lib o‘tgan "Eco Expo Central Asia – 2025" ko‘rgazmasi O‘zbekistonning ekologik innovatsiyalar bilan bir qatorda barqaror turizm sohasida qanday ulkan salohiyatga ega ekanini namoyon etdi. 30 dan ortiq mamlakat vakillari ishtirok etgan ushbu yirik tadbirda turizmga bag‘ishlangan alohida pavilyon katta e’tiborni tortdi.
Ekoturizm pavilyonida O‘zbekistonning turli hududlaridagi tabiatni asrab-avaylash, mahalliy hamjamiyatlar ishtirokida sayohatlarni tashkil etish, shuningdek, milliy bog‘lar va madaniy meros obidalarini qamrab olgan “yashil yo‘nalishlar” haqida keng ma’lumotlar berildi.
Ko‘rgazma ishtirokchilariga quyidagilar taqdim etildi:
- Qo‘riqlanadigan hududlarga sayohat marshrutlari;
- Ekologik toza turar joylar va agro-turizm namunalar;
- Samarkand, Shahrisabz, Surxondaryo, Xorazm kabi viloyatlardagi ekologik sayohat imkoniyatlari.
Ko‘rgazma doirasida alohida e’tibor Shahrisabz shahriga qaratildi. 2024-yilda EKO Turizm poytaxti deb e’lon qilingan bu qadimiy shaharda hozirda mahalliy aholi ishtirokida tashkil etilayotgan eko-marshrutlar, uy-mehmonxonalari va hunarmandchilik markazlari xalqaro mehmonlarga katta qiziqish uyg‘otmoqda.
Ekoturizmni rivojlantirishda yosh tadbirkorlar ham faol ishtirok etdi. Ko‘rgazma doirasida o‘tkazilgan "Green Startups" tanlovida bir nechta mahalliy loyihalar taqdim etildi:
- Aralbo‘yida ekologik kamping zonalari;
- Mahalliy ustalar bilan hunarmandlik ustaxonalari;
- Qishloq turizmiga oid “eco-lodge” va eko-taom kurslari.
Eng yaxshi loyihalar xalqaro investorlar tomonidan qiziqish bilan kutib olindi va ayrimlarining 2025-yilgi Expo Osakada ishtiroki rejalashtirildi.
Ekspertlar fikriga ko‘ra, O‘zbekistonda ekoturizm nafaqat iqtisodiy foyda keltiradi, balki:
- Mahalliy aholining barqaror daromad manbalarini yaratadi;
- Tabiiy resurslarning asrab qolinishini rag‘batlantiradi;
- Sayyohlar ongida ekologik mas’uliyatni shakllantiradi.
Ko‘rgazmada Turizm qo‘mitasi vakillari va viloyat hokimliklari 2025–2026-yillarda amalga oshiriladigan quyidagi rejalar bilan tanishtirdi:
- Aral hududida ekologik muzey va marshrutlar tarmog‘i ochilishi;
- Yashil turizm uchun mobil ilovalar va raqamli xaritalar ishlab chiqilishi;
- Ekoturizmga bag‘ishlangan milliy va xalqaro festivallarni yo‘lga qo‘yish.
"Eco Expo Central Asia – 2025" doirasida o‘tkazilgan turizm tadbirlari O‘zbekistonning ekologik va madaniy boyliklarini zamonaviy, barqaror turizm vositasida dunyoga namoyish qilishga tayyor ekanini isbotladi. Bu nafaqat mamlakat imidji uchun, balki kelajak avlod uchun ham muhim qadamlardan biridir.
82 
