Turizm insonning boʻsh vaqtida oʻtkazadigan faol dam olish turlaridan biridir. Ushbu soha madaniyatlararo muloqotning yorqin namunasi boʻlib xizmat qiladi. Bu odamlarga turli madaniyatlarni boshdan kechirish, chet tillarida muloqot qilish, oʻziga xos taomlarni tatib koʻrish, yangi odamlar bilan tanishish va bagʻrikenglikni shakllantirish imkoniyatini beradi. Bugungi kunda turizmning koʻplab turlari mavjud boʻlib, ular sayohatchilarning ehtiyojlari va xohishlaridan kelib chiqqan holda shakllanadi.
Butunjahon turizm kuni sayohatchilar va ushbu sohada ishlayotgan mutaxassislarning bayramidir. Butunjahon turizm kuni 1979-yilda Ispaniyaning Torremolino shahrida Jahon sayyohlik tashkiloti, UNWTO Bosh assambleyasi tomonidan ta’sis etilgan va har yili 27-sentabrda nishonlanadi. Sana tasodifan tanlanmagan – aynan to‘qqiz yil avval, 27-sentabrda Jahon sayyohlik tashkilotining Nizomi qabul qilingan bo‘lib, u hozir ham amalda. Bayramdan ko‘zlangan maqsad turizmni rivojlantirish, uning jahon hamjamiyatining iqtisodiyotiga qo‘shgan hissasini yoritish, turli mamlakatlar xalqlari o‘rtasidagi aloqalarni rivojlantirishdan iborat.
Butunjahon turizm kunining tarixi 1925-yilda Gaagada boshlangan. Aynan shu davrda rasmiy turistik tashkilotlarning xalqaro kongressi tuzilib, keyinchalik Jahon sayyohlik tashkiloti (UNWTO) deb nomlandi. Kongressdan ko‘zlangan maqsad nafaqat umumiy turizm, balki uning tijorat jihatlari va turli mamlakatlar iqtisodiyoti imkoniyatlarini rivojlantirishga ko‘maklashishdan iborat. Har yili Butunjahon turizm kuni alohida shior ostida nishonlanadi. 2024-yilgi mavzu - “Turizm va tinchlik”. BMT ma’lumotlariga ko‘ra, turizm tinchlik va xalqlar o‘rtasidagi o‘zaro hamjihatlikni mustahkamlashda muhim o‘rin tutadi.
82 
