Capsule Inn Osaka, Yaponiya
Dunyodagi ilk kapsulali mehmonxona 1979-yilda Yaponiyada paydo bo‘lgan. Mimor Kisyo Kurokava charchagan sayyohlar faqat uxlashlari mumkin bo‘lgan mehmonxona g‘oyasini ilgari surgan va u hali ham faoliyat yuritmoqda. Kapsula-nomer — balandligi 1,25 metr bo‘lgan hujra. Bu kapsulalar bitta zalda ikki qator qilib joylashtirilgan bo‘lib, televizor, konditsioner va budilniklar bilan jihozlangan. Otelde shuningdek, ikki va uch kishilik, ikki qavatli karavotli xonalar ham mavjud. Ularning maydoni biroz kattaroq (inson tik tura oladi), televizor, stol va stullar bilan taʼminlangan.
Pod, AQSH
Bu mehmonxona tarmog‘i Nyu-York markazida joylashgan Pod39 va Pod51 otellarini o‘z ichiga oladi. U yerdagi eng kichik xonalar maydoni — 8 kv. m. Har bir xona mp3-pleyer, iPhone uchun dok-stansiya, konditsioner, seyf va televizor bilan jihozlangan. Bu endi kapsula emas, balki to‘liq bitta xona bo‘lib, ichida sanuzel ham bor. Karavotdan tashqari mebellar ham qo‘yilgan. Har ikki mehmonxona tomida ochiq osmon ostida yozgi barlar ishlaydi va ulardan shaharning go‘zal manzarasi namoyon bo‘ladi.
Tubohotel, Meksika
Suv quvurida dam olishga qanday qaraysiz? Bu g‘alati tuyulishi mumkin, ammo Tepostlan shahridagi Tubohotel mehmonlari uchun umuman bunday emas. Mehmonxona egasi Robbi Anderson tashlab yuborilgan beton quvurlarni topib, ulardan hujra yasash g‘oyasini amalga oshirgan. Har bir 10 kvadrat metrlik quvur-nomerda qulay karavot va kichik shkaf joylashgan. Vanna xonalari esa mehmonxona hududida alohida qurilgan. Noodatiy uslubi tufayli otel ko‘plab sayyohlarni o‘ziga jalb qiladi, ammo piramidosimon qilib terilgan quvurlar soni 20 ta bo‘lgani uchun joylar ko‘pincha yetishmaydi. Shu bois, mehmonxona maʼmuriyati $15 evaziga hududda palatka qo‘yish imkoniyatini ham taklif etadi.
Sleepbox, Rossiya
Rus meʼmorlari chet el tajribasini o‘rganib, 2013-yilda poytaxtda ilk kapsulali mehmonxona ochishdi. U Moskva markazida, 1-Tverskoy-Yamskoy ko‘chasida joylashgan. Mijozlar qulay joylashuvi va tozaligi uchun yuqori baholashadi. Mutaxassislar esa otelning Tokiodagi analogidan ham yaxshiroq ekanligini taʼkidlashadi. Sleepbox‘da 61 ta xona mavjud: ikki qavatli kapsulalar ham, alohida funksional xonalar ham bor. Ular karavot, stol, shkaf va konditsioner bilan jihozlangan. Biroz qimmatroq xonalarda televizor ham qo‘yilgan. Aksariyat mehmonxonalar kabi, bu yerda ham bepul Wi-Fi va yuk saqlash xonalari xizmat ko‘rsatadi.
82 
