Qahva plantatsiyasidagi otel, Kosta-Rika
Kosta-Rikaning tropik o‘rmonlari bag‘rida, organik qahva plantatsiyasi hududida joylashgan Finca Rosa Blanca Coffee Plantation and Inn ekologik oteli tabiat va barqaror texnologiyalar uyg‘unligining yorqin namunasidir. Bino qayta ishlangan materiallar va innovatsion yechimlar asosida qurilgan bo‘lib, elektr tarmog‘i yer ostida o‘tkazilgan – bu tabiiy manzarani saqlab qolish imkonini beradi.
Bu yerda hech qanday organik chiqindi isrof bo‘lmaydi: qahva mevasining poyasi va boshqa organik chiqindilar chirindi o‘g‘it tayyorlash uchun maxsus chuqurlarga tashlanib, tabiiy o‘g‘itga aylantiriladi. Qayta ishlangan qahva sellyulozasi esa yerga qaytarilib, yangi o‘simliklarni oziqlantiradi.
Osmondagi bog‘, Singapur
16 qavatli Parkroyal on Pickering mehmonxonasining har to‘rtinchi qavati haqiqiy tropik oazisga aylangan: yashillikka burkangan terrasalar, shaffof sharsharalar va pog‘onali suv oqimlari binoga go‘yo bog‘ ichida o‘sib chiqqanidek taassurot beradi.
Interyer bezaklarida tabiiy materiallar — yog‘och, tosh, mayda shag‘al hamda keng panoramali shisha konstruksiyalardan foydalanilgan. Bu esa binoda doim yorug‘lik va kenglik hissini uyg‘otadi.
Yashil hududlarning umumiy maydoni 15 ming kvadrat metrdan ziyodni tashkil etadi. Bu yerda ekologik texnologiyalar shunchaki qo‘shimcha emas, balki butun konsepsiyaning asosidir: yorug‘lik, isitish va sug‘orishni avtomatik boshqarish tizimlari, quyosh panellari hamda yomg‘ir suvini to‘plash texnologiyalari tabiiy resurslarni tejash va atrof-muhitga zararni kamaytirishga yordam beradi.
Parkroyal on Pickering mehmonxonasi Forbes tomonidan tuzilgan “kelajakning yetti mehmonxonasi” ro‘yxatiga bejiz kiritilmagan — u kelajak shahri qanday bo‘lishi mumkinligining yorqin namunasi: jonli, yashil va aqlli
Bogemiya o‘rmonlari bag‘ridagi ekoqasr, Chexiya
Praga yaqinidagi ko‘p asrlik daraxtlar bag‘rida joylashgan XVII asrga mansub qadimiy qasr bugun Yevropadagi eng mashhur ekootellardan biri — Chateau Mcely ga aylangan. Besh yulduzli ushbu qasr Chexiyadagi birinchi “yashil” mehmonxona sifatida Ecolabel — Yevropa sifat belgisi bilan taqdirlangan va World Travel Awards talqinida «Jahonning eng yaxshi ekologik mehmonxonasi» deb eʼtirof etilgan.
Ehtiyotkorlik bilan amalga oshirilgan qayta taʼmirlash ishlaridan so‘ng, tarixiy binoga yashil texnologiyalar bilan uyg‘unlashgan aristokratik ziyofat va shukuh yanadan hayot baxshida etdi. Bu yerda elektr energiya faqat qayta tiklanuvchi manbalar orqali taʼminlanadi, chiqindilar esa qatʼiy saralanadi. Iflos suvlar esa maxsus ko‘p bosqichli tozalash tizimi orqali qayta ishlanadi.
Mehmonxonadagi 23 ta xonadan har biri alohida uslubda bezatilgan bo‘lib, mehmonlarga qulaylik, tinchlik va tabiat bilan uyg‘unlik hissini baxshida etadi.
Chateau Mcely — bu shunchaki mehmonxona emas, balki tarix, ekologiya va shinamlik mukammal uyg‘unlikda uchrashadigan maskandir.
Ikkilamchi xom ashyodan qurilgan qishloqcha uslubidagi mehmonxona, AQSH
Kaliforniya shtatidagi Napa sharobchilik mintaqasining yuragida AQSHdagi eng ekologik mehmonxonalardan biri — Bardessono joylashgan.
Uning qurilishi tabiatga ehtiyotkor munosabat namunasi bo‘ldi: qurilish chiqindilarining taxminan 93 foizi darhol qayta ishlangan va binoning o‘zi deyarli to‘liq ikkilamchi xom ashyodan barpo etilgan.
Mehmonxona interyerlari qayta tiklangan yog‘och materiallar bilan bezatilgan, tom qismi yorug‘likni aks ettiruvchi materiallar bilan qoplangan va quyosh panellari bilan jihozlangan. 62 ta nomerdagi keng oynalar xonalarni tabiiy yorug‘lik bilan to‘ldiradi, bu esa elektr energiyasi isteʼmolini kamaytiradi.
U yerdagi “aqlli uy” tizimi harakat datchiklari orqali isitish jarayonini boshqaradi — ehtiyojga qarab avtomatik yonib-o‘chadi. Kirish zalini esa vertikal bog‘ bezab turadi. Butun hududdagi o‘simliklarni sug‘orish uchun issiqlik va suv tejovchi qatrali sug‘orish tizimi qo‘llaniladi.
Bardessono — bu qishloqcha soddaligi, zamonaviy dizayn va ekologik masʼuliyat uyg‘unlashgan, shinamlik hamda qulaylik ila boyitilgan hayot tarzi namunasidir.
Maldivdagi Kunfunadu orolida joylashgan “yashil” mehmonxona
Maldiv orollaridagi Kunfunadu nomli xilvat tropik orolda joylashgan Soneva Fushi eko-kurorti — bu inson tabiatga takror qaytadigan maskan. Bu yerda “No news, no shoes” —shiori amal qiladi: mehmonlar joylashish paytida oyoq kiyimlarini yechishadi va tashqi dunyo g‘avg‘osidan biroz orom olishadi.
Kompleks plastikdan to‘liq voz kechgan — ichimlik suvi faqat shisha idishlarda beriladi, barcha sumka, paket va qo‘shimcha qadoqlar ekologik, parchalanuvchi materiallardan tayyorlangan. 2008 yildan buyon orolda chiqindilarni qayta ishlash markazi faoliyat yuritadi. Bu yerda chiqindilar o‘g‘it va biogazga aylantiriladi, qayta ishlangan shishadan esa qurilish materiallari tayyorlanadi.
Soneva Fushi — bu shunchaki dam olish emas, balki ekologik turmush tarzi, bu yerda har bir qaror orolning noyob tabiati va butun sayyorani asrash maqsadida qabul qilinadi.
82 
