O'zbekiston Respublikasi Prezidentining 2025 yil 15 maydagi "2025-2026 yillarda turizm oqimini keskin oshirish va turizmning iqtisodiyotdagi o'rni va ahamiyatini oshirish maqsadida turizm xizmatlari hajmini jadal kengaytirish chora–tadbirlari to'g'risida"gi PF-87-sonli farmoni qabul qilindi.
Mazkur Farmon mamlakat turizm sohasini faol rivojlantirishga qaratilgan strategik hujjat hisoblanib 2025-yil 20-maydan kuchga kirdi va turizmning turli jihatlarini qamrab oluvchi bir qator asosiy tashabbuslarni o'z ichiga oladi.
Asosiy maqsad va vazifalar
Chet ellik sayyohlarni jalb qilish: 2025 yil oxirigacha respublikaning turli mintaqalariga chet el fuqarolarining 15,8 million tashrifiga erishish.
Ichki turizmni rivojlantirish: mahalliy aholining mamlakat bo'ylab 40 million sayohatini tashkil etish va 378 ta yangi turoperator faoliyatini faollashtirish.
Turistik xizmatlar eksporti: turistik xizmatlar eksportini 4 milliard AQSh dollarigacha oshirish.
Viza imtiyozlari
2025-yil 1-iyundan boshlab Bahrayn Qirolligi, Quvayt davlati va Ummon Sultonligi fuqarolari uchun O'zbekiston Respublikasi hududiga kirgan kundan boshlab 30 kun muddatga vizasiz rejim belgilandi.
Turizm infratuzilmasini qo'llab-quvvatlash
Modulli mehmonxonalar uchun subsidiyalar: 2027-yil 1-yanvargacha tadbirkorlarga modulli mehmonxonalarni qurish va jihozlash uchun bir martalik subsidiyalar beriladi:
I toifali mehmonxonada har bir o'rin uchun 10 mln so'm;
II toifali mehmonxonada har bir o'rin uchun 7 mln so'm;
III toifali mehmonxonada har bir o'rin uchun 5 mln so'm.
Tibbiy turizmni rivojlantirish: 2028-yil 1-yanvargacha tibbiy turizm klasterlari xodimlarining malakasini oshirish xarajatlarining bir qismi qoplanadi. 2030 yil 1 yanvargacha ushbu klasterlarning xizmatlari xalqaro sayyohlik va tibbiyot yarmarkalari va ko'rgazmalarida targ'ib qilinadi.
Madaniy va sayyohlik tashabbuslari
Xalqaro turizm haftaligi: 2025 yildan boshlab har yili noyabr oyining uchinchi haftasida xalqaro turizm haftaligi o'tkaziladi.
"O'zbekiston bo'ylab sayohat qiling!": 2025 yil iyun oyidan boshlab oyning har ikkinchi shanba va yakshanba kunlari oilaviy va jamoaviy sayohat kunlari deb e'lon qilinadi.
Yoshlarni rag'batlantirish: yoshlar o'rtasida respublika darajasida o'tkaziladigan sport musobaqalari g'oliblari "O'zbekiston bo'ylab sayohat"yo'llanmasi bilan taqdirlanadilar.
Turizmni raqamlashtirish
2025-yil 1-iyundan boshlab turizm sohasidagi barcha davlat elektron tizimlari va platformalari yagona milliy turizm platformasi doirasida ishlab chiqiladi.
Hujjat bilan batafsil ma'lumotni quyidagi havolada topishingiz mumkin https://lex.uz/pdfs/7531559.
82 
