Togʻ - changʻi kurortlarida dam oluvchilar qolishlari uchun juda katta tanlovdagi joylar mavjud. Bular ham mehmonxonalar, apartamentlar va ham shalelar boʻlishi mumkin.
“Shale” soʻzi birinchi marta 1328-yilda tilga olingan boʻlib, Shveytsariyada fermerlar tomonidan qurilgan oddiy yogʻoch kulbalarni ifodalaydi. Fransuz tilidan tarjima qilinganda “chalet” soʻzi kichik qishloq uyi, soʻzma - soʻz tarjimada esa “choʻponning kulbasi” degan ma’noni anglatadi. Shale uslubi Shveytsariyada, Alp togʻlarining togʻli hududlarida paydo boʻlgan. Oddiy qilib aytganda, shale koʻpincha togʻlarda joylashgan va Shveytsariya uslubida qurilgan shinam uydir.
Turizmning rivojlanishi bilan shalelar, ayniqsa, Alp togʻlarida dam olish uylari sifatida qabul qilina boshlandi. Koʻpincha uylar yogʻochdan yasalgan boʻladi. Bunday uylarning tomi odatda katta burchak ostida joylashganki, har qanday yogʻingarchilik – qor, yomgʻir, doʻl oʻz - oʻzidan tushib ketadi. Aksar hollarda bunday uylarda katta yoki panoramali derazalar oʻrnatiladi. Toʻliq jihozlangan oshxonalar, yashash xonalari va yotoq xonalari mavjud. Togʻli kurortlarda joylashgan shalelarda tezda isinish uchun albatta kamin boʻladi. Qulay qishloq lazzati va tabiatga maksimal darajada yaqinlikdan tashqari, shalelar qulay yashash uchun zarur boʻlgan barcha narsalar bilan jihozlangan. Har bir uy turli xilda ichki bezatilishi, mebel va jihozlanishi bilan farq qiladi. Mehmonlar bu yerda sport jihozlarini ijaraga olishlari mumkin.
Sayyohlik tashriflari uchun moʻljallangan zamonaviy shalelar eng yuqori darajadagi qulayliklarga ega uylardir. Bunday uyda dam olish juda maroqli. Shale - tabiat bilan uygʻunlikni his qilish, shahar shovqinidan dam olish va unutilmas ta’til uchun eng yaxshi variantlardan biri.
82 
