Sertifikatlangan turizm obyektlari nazorat rejasi tasdiqlandi

2026-yil mart oyi uchun inspeksiya nazorati rejasi tasdiqlandi. Rejaga muvofiq, 80 ta joylashtirish vositasi hamda 3 ta turoperatorda nazorat tadbirlari o‘tkaziladi.

O‘zbekiston Respublikasi Vazirlar Mahkamasining 2020-yil 10-iyuldagi 433-son qarori bilan tasdiqlangan “Turistik xizmatlarni sertifikatlashtirish va turistik industriya obyektlarini tasniflash tartibi to‘g‘risida”gi Nizomning 49-bandiga asosan Turizm qo‘mitasi tomonidan sertifikatlashtirilgan xizmatlar yuzasidan inspeksiya nazorati rejasi shakllantiriladi va tasdiqlanadi.

Inspeksiya nazorati — sertifikatlashtirilgan obyektlarning avval belgilangan normativ hujjatlar talablariga muvofiqligini tasdiqlash maqsadida amalga oshiriladigan davriy qayta baholash jarayonidir.

Nazorat tadbirlari davomida joylashtirish vositalarining O‘z DSt 3220:2023 davlat standarti talablariga, toifaga ega joylashtirish vositalarining esa O‘z MSt 125:2024 milliy standarti talablariga muvofiqligi baholanadi.

Inspeksiya yakunlari bo‘yicha standart talablariga rioya etilmagani aniqlangan taqdirda, turizm obyektining sertifikati amal qilishini to‘xtatib turish yuzasidan tegishli qaror qabul qilinadi.