Indoneziya Yava orolining markaziy qismida, Salatiga shahrida PituRooms mehmonxonasi bor-yo‘g‘i 2,8 metr kenglikdagi maydonni egallaydi. Mehmonxona xuddi boshqa uylar orasiga tiqilib qolgandek taassurot uyg‘otadi, chunki qurilish maydonining hajman oshirish imkonsiz edi. Afsuski, vulqonli tog‘lar etagidagi hudud qurilishdagi qiyinchiliklar sabab uzoq vaqtdan beri investorlarni o‘ziga jalb eta olmagandi.
Diqqatga sazovor obyekt “Sahabat Selojene” arxitektura studiyasi tomonidan yaratilgan bo‘lib, u “tarixdagi eng tor mehmonxona” deb ataldi. Uning asoschisi va hozirda PituRooms menejeri Ari Indra e’tirof etganidek, bino ustida ishlash “cheklovlarni qanday qilib potentsialga aylantirish mumkinligini” ko‘rsatib bera oladigan “haqiqiy chorlov” bo‘ldi.
Besh qavatli mehmonxona atigi 2,8 m dan 3 m gacha bo‘lgan yettita xonadan iborat, shift balandligi esa 2,4 m. Barcha lyuks xonalar ikki kishilik yotoq va dushli hammom bilan jihozlangan. Har bir xonada ikkitadan oyna mavjud.
Mehmonxona maxsus buyurtma qilingan san’at asarlari bilan bezatilgan va dizaynerlar tomonidan tanlangan ranglar palitrasi har bir yotoqxonaga “betakror xarakter” beradi. PituRoomsning yuqori qavatida bar va restoran joylashgan bo‘lib, bu yerda shahar manzaralaridan zavqlanish mumkin.
Mehmonxonani qurishda joyning o‘ziga xosligi va joylashuvi tufayli oddiy svayalardan emas, balki chuqur quduq poydevoridan foydalanishga qaror qilindi. Binoning tashqi ko‘rinishi Agra Red qumtosh panellari bilan qoplangan.
Biroq, me’mor ta’kidlaganidek, mehmonxonada bo‘lgan mehmonlar, aslida, odamning farovon hayot kechirishi uchun qanchalik kam joy zarurligidan hayratda qolishadi.
82 
