Sifat menejmenti tizimini (SMT) rahbariyat tomonidan tahlil qilish – sifat menejmenti tizimining yaroqliligi, samaradorligi, adekvatligi va natijaviyligini aniqlash uchun korxona rahbariyati tomonidan tekshirish tartibidir.
Korxonalarda rahbariyat tomonidan SMTni tahlil qilish tizimning sifat siyosatiga, shuningdek standart talablariga muvofiqligini ta’minlash uchun doimiy ravishda amalga oshiriladi. Rahbariyat tomonidan tahlil innovatsion takomillashtirish imkoniyatlarini va tashkilotning boshqaruv tizimidagi oʻzgarishlarini, shu jumladan, strategiya va maqsadlarga boʻlgan ehtiyojni baholashni oʻz ichiga olishi kerak.
Sifat menejmenti tizimini tahlil qilish maqsadlari quyidagilardir:
- sifat siyosatini tanlashning toʻgʻriligini va uning samaradorligini baholash;
- amalga oshirilayotgan faoliyat bilan bogʻliq jarayonlar uchun protseduralarni hujjatlashtirishning etarliligini baholash;
- amalga oshirilayotgan faoliyatning hujjatlashtirilgan protseduralarga muvofiqligini baholash;
- belgilangan siyosatga nisbatan joriy etilgan sifat menejmenti tizimining samaradorligini baholash;
- sifat menejmenti tizimini takomillashtirish va bajarilgan ishlarning sifat darajasini oshirish;
- SMT samaradorligini oshirishda korxona xodimlarini jalb qilish;0
- ishlab chiqarish jarayonining barcha ishtirokchilari tomonidan shaxs, ishlab chiqarish va sanoat tarmoqlari manfaatlari yoʻlida takomillashtirish uchun sharoit yaratish.
SMTni rahbariyat tomonidan tahlil qilish tizim boʻyicha toʻplangan tizimlashtirilgan axborotlarga (ma’lumotlarga), shuningdek turli xil tashqi manbalardan olingan ma’lumotlarga asoslanadi. SMT tahlili korxona rahbarlariga tizimning ishlashini muntazam va obyektiv baholashga hamda ogohlantirish va tuzatish harakatlarining maqsadga muvofiqligi va adekvatligini aniqlashga yordam beradi.
82 
