Joriy yilning 12 oktabr kuni O‘zbekiston Oshpazlar uyushmasida Xalqaro o‘zbek pazandalik sanʼati markazi tomonidan oshpazlik sirlarini o‘rganuvchi talabalar uchun imtihon tashkil etildi.
Tadbirda, Turizm va madaniy meros vazirligi huzuridagi UNWTOning "Ipak yo‘li ofisi" maslahatchisi Shuhrat Isakulov, Turizm xizmatlarini sertifikatlash markazi DUK direktor o‘rinbosari Xatamov Iskandar, Turizm xizmatlarini sertifikatlash markazi DUK direktor maslahatchisi Akramova Shaxzoda, O‘zbekiston Oshpazlar uyushmasi raisi Umarov Akbar, Xalqaro o‘zbek pazandalik sanʼati markazi direktori Umarova Nargiza hakamlar hay’ati a’zolari sifatida ishtirok etdi.
Tadbirda so‘zga chiqqan Turizm va madaniy meros vazirligi huzuridagi UNWTOning "Ipak yo‘li ofisi" maslahatchisi Sh.Isakulov imtihon ishtirokchilarini Turizm va madaniy meros vazirligi nomidan tabriklab, gastronomik turizmni rivojlantirishda, o‘zbek milliy pazandachiligi, urf - odatlari, ovqatlanish madaniyati va milliy taomlarimizni xalqaro miqyosda targ‘ib qilish va ommalashtirish yuzasidan loyihalarni amalga oshirishda grantlar ajratilganligini alohida ta’kidladi.
O‘zbekiston Oshpazlar uyushmasi raisi A.Umarov so‘zga chiqar ekan, “Oshpazlar uyushmasi Butunjaxon Bosh Oshpazlar Hamjamiyatiga a’zo bo‘lib, 2016 yilning 1 dekabrida “Palov madaniyati va an’analari” nominatsiyasini YuNESKOning nomoddiy ma’naviy reprezentativ me’ros ro‘yxatiga kiritishga muvaffaq bo‘ldik hamda 2017 yil 8 sentabrda O‘zbek milliy shoh taomi “Ginneslar rekordi” kitobiga kiritildi shu bilan birga, o‘zbek milliy pazandachilik san’atini jahonga namoyish etib yuqori natijalarga erishib kelinmoqda, - dedi u.
Xalqaro o‘zbek pazandalik sanʼati markazi tomonidan tashkil etilgan kurslarda talabalar quyidagi yo‘nalishlar bo‘yicha tahsil olib imtihon topshirdilar, jumladan,
-
sanitariya-gigiyena qoidalari;
-
kasbiy etika;
-
oziq-ovqat mahsulotlarinining tovarshunosligi;
-
umumiy ovqatlabish korxonalarida buxgalteriya hisobi va xarajatlarni hisobga olish;
-
qayla va suyuq taomlar tayyorlash texnologiyasi;
-
salatlar tayyorlash texnologiyasi;
-
xamir mahsulotlaridan taomlar tayyorlash texnologiyasi;
-
mehmonlarga xizmat ko‘rsatishni tashkil etish.
Milliy va xorijiy taomlarni tayyorlash o‘quv kurslar davomiyligi 3 oy bo‘lib, kurslar yakunida imtixondan muvaffaqiyatli o‘tgan talabalarga O‘zbekiston Oshpazlar uyushmasining maxsus diplomlari taqdim qilinadi. 120 ta davlatdan akkreditatsiyadan o‘tgan uyushma tomonidan topshirilgan diplom bilan bitiruvchilar shu mamlakatlarda o‘z faoliyatlarini olib borishlari mumkin bo‘ladi.
Uyushma raisi Umarov Akbar mehmonlarni uyushma faoliyati u oshpazlar uchun yaratilgan sharoitlar bilan yaqindan tanishtirdi. Shuningdek, kelgusida O‘zbekiston Oshpazlar uyushmasi hamda Turizm xizmatlarini sertifikatlash markazi DUK bilan hamkorlikda “O‘zbek nonushtasini” mehmonxonalarda joriy etish masalalari muhokama qilinib olindi.
O‘zbekiston Oshpazlar uyushmasi raisi Umarov Akbar Turizm xizmatlarini sertifikatlash markazi DUK vakillariga esdalik sovg‘alarini taqdim etdi.
Ma’lumot uchun, O‘zbekistonning milliy pazandachiligini saqlab qolish va yanada ommalashtirish, xalqaro darajadagi oshpazlar tayyorlash, umumiy ovqatlanish tashkilotlarini rivojlantirish yuzasidan jamoatchilik tashabbuslarini qo‘llab-quvvatlash, ularga xalqaro standartlarni joriy etish, zamonaviy talablarga muvofiq umumiy ovqatlanish sohasida oshpazlar, pazandalar, qandolatchilar, ofitsiantlar va boshqa mutaxassislarning kasbiy darajasini oshirish tizimini tashkil etish maqsadida O‘zbekiston Respublikasi Vazirlar Mahkamasining 2012-yil 10-oktabrdagi “Umumiy ovqatlanish korxonalari faoliyatini yanada takomillashtirish va xodimlarining kasbiy malakasini oshirish chora-tadbirlari to‘g‘risida”gi 289-son qarori asosida O’zbekiston Oshpazlar uyushmasi O‘zbekistonda tashkil etilgan.