O‘zbekiston Respublikasi Prezidentining 2023-yil 26-apreldagi PQ-135-son qarorida mamlakatdagi mehmonxonalar, ulardagi sharoitlarni xatlovdan o‘tkazib, 2023-yil 1-oktabrga qadar xorijiy konsalting kompaniyalarini jalb qilgan holda kamida 50 ta mehmonxonaga «to‘rt yulduz» va 200 tasiga «uch yulduz» olib berish choralarini ko‘rish vazifasi belgilangan.
Shu bois Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi tomonidan turizm sohasi ilgʻor rivojlangan davlatlarning mehmonhonalarga yulduz toifasini belgilovchi hujjatlarining talablari o‘rganildi.
O‘rganish natijasida, amaldagi davlat standarti talablari qayta ko‘rib chiqildi va balli tasniflash orqali yulduz toifasini beruvchi yangi standart loyihasi Oʻzbekiston mehmonxonalar uyushmasi bilan birgalikda ishlab chiqildi. Yangi davlat standartiga kiritilgan talablar Hilton, Hampton by Hilton, Hyatt Regency Tashkent, Wyndham Hotels & Resorts mehmonxonalari biznes vakillari va boshqa mehmonxona vakillari bilan kelishildi.
Turizm qo‘mitasi qoshidagi STQ 4 “Turizm va madaniy meros” standartlashtirish bo‘yicha texnik qo‘mita tomonidan Oʻz DSt 3296:2023 “Turizm xizmatlari. Joylashtirish vositalari. Balli tasniflash tizimi” davlat standarti ishlab chiqildi. Mazkur davlat standarti O‘zbekiston texnik jihatdan tartibga solish agentligining 2023-yil 7-iyuldagi 05-1560-son buyrugʻi bilan qabul qilindi va O‘zbekiston Respublikasi Adliya vazirligi tomonidan 2023-yil 7-avgustda 194-son bilan hisobga olindi hamda joriy yilning 7-noyabridan amalga joriy etiladi.
Oʻz DSt 3296:2023 davlat standarti mehmonxonalarni balli asosda tasniflash tizimini belgilaydi. Toifalar “*” (yulduz) belgisi bilan belgilanadi va beshta toifa bo‘yicha tasniflanadi. Joylashtirish vositalari uchun – eng yuqori toifa “*****” (besh yulduz) va eng past “*” (bitta yulduz) hisoblanadi.
Joylashtirish vositalari mazkur davlat standartining ilovasiga muvofiq tasniflanadi. Bunda “m” bajarilishi majburiy bo‘lgan talablarni belgilaydi. Majburiy bo‘lmagan talablar bajarilganda esa qo‘shimcha ball beriladi. Ballar yig‘indisiga ko‘ra tegishli yulduz toifasi beriladi.
Shu bilan birga yangi davlat standarti O‘zbekiston Respublikasi Favqulodda vaziyatlar vazirligi, Ichki ishlar vazirligi, Sog‘liqni saqlash vazirligi, Qurilish va uy-joy kommunal xizmat ko‘rsatish vazirligi, Ekologiya, atrof-muhitni muhofaza qilish va iqlim o‘zgarishi vazirligi bilan kelishildi.
Yangi davlat standarti amalga joriy etilgan sanadan O‘zbekiston standartlashtirish, metrologiya va sertifikatlashtirish agentligining 2018-yil 7-fevraldagi 05-925-son qarori bilan tasdiqlangan O‘z DSt 3296:2018 “Turizm xizmatlari. Mehmonxonalar va o‘xshash joylashtirish vositalari. Tasniflash tizimi” davlat standarti o‘z kuchini yo‘qotgan hisoblanadi
Qo‘shimcha ravishda, O‘zbekiston Respublikasi Prezidentining 2023-yil 27-iyuldagi PQ-238-son qaroriga muvofiq mehmonxonalar sonini va ularda xizmat ko‘rsatish sifatini oshirishni davlat tomonidan moliyaviy qo‘llab-quvvatlash maqsadida 2024-yil 1-yanvardan boshlab 3 yulduzli toifa uchun 60 ta xonadan kam bo‘lmagan, 4 va 5 yulduzli toifa uchun 120 ta xonadan kam bo‘lmagan xonalar fondiga ega besh qavatdan past bo‘lmagan mehmonxona 2026-yil 31-dekabrga qadar foydalanishga topshirilgan taqdirda, mehmonxona toifasi tasdiqlangach, investorlarning yangi mehmonxonani qurish (rekonstruksiya qilish bundan mustasno) va jihozlash uchun ketgan xarajatlarining bir qismini O‘zbekiston Respublikasi Davlat budjeti mablag‘lari hisobidan qoplab berish tizimi joriy qilinadi. Bunda 3 yulduzli toifaga ega mehmonxonalardagi har bir xona uchun 40 million so‘m; 4 va 5 yulduzli toifaga ega mehmonxonalardagi har bir xona uchun 65 million so‘m miqdorlarda mablagʻlar qoplab berilishi belgilanganligi ma’lum qilinadi.