“BBC World News” telekanali O‘zbekiston turizmiga bag‘ishlangan targ‘ibot kampaniyasini boshladi, u yil oxirigacha: Osiyo-tinch okeani mintaqasi, Yevropa va Shimoliy Amerikada davom etadi.
Xalqaro telekanalda boshlangan reklama kampaniyasi O‘zbekistonning noyob madaniy-tarixiy diqqatga sazovor joylari bilan tanishtiradi. Qadimiy Samarqand, Buxoro va Xiva shaharlaridan tortib, hozirgi Toshkent shahrigacha.
Jahonning yetakchi telekanali “BBC World News” tomonidan butun dunyo sayyohlarining katta auditoriyasini o‘zida jam qilgan “The Travel Show” haftalik teledasturi orqali O‘zbekistonning turizm salohiyatiga bag‘ishlangan maxsus ko‘rsatuvlar tez orada efirga uzatiladi.
Dunyo bo‘ylab 200 dan ortiq mamlakatlar va hududlarda jami 450 milliondan ortiq auditoriya kuzatib boruvchi “BBC World News” telekompaniyasi bilan Madaniyat va turizm vazirligi hamkorligida amalga oshirilayotgan loyihaga ko‘ra, “The Travel Show” haftalik teledasturi doirasida maxsus O‘zbekistonga bag‘ishlangan 23 daqiqalik teleko‘rsatuv ommaga havola etilishi rejalashtirilgan.
“BBC World News” telekanalida O‘zbekiston haqida to‘liq metrajli 23 daqiqalik maxsus ko‘rsatuv premyeradan tashqari 4 oy davomida takroran 4 marotaba efirga chiqishi belgilangan.
Shuningdek, BBC World News telekanalida O‘zbekiston haqidagi Sayohat ko‘rsatuvining maxsus sonini e’lon qiluvchi 4 daqiqalik promo-modullar tayyorlanishi va efirga uzatilishi rejalashtirilgan.
“BBC Travel” ijtimoiy tarmoqlarida O‘zbekiston haqidagi “Travel Show” dasturining maxsus soni efirga uzatilishidan avval doimiy ravishda targ‘ib qilinadi. Dastur materiallari bilan onlayn video parchalar “BBC Travel Show” dasturi sahifasida, “BBC News” onlayn va “BBC Reel”da efirga uzatiladi.