Sayohatni rejalashtirish va mehmonxona tanlashda sayohatchilar koʻpincha mehmonxonada ovqat tanlash masalasiga duch kelishadi. Axir, tanlangan oziq-ovqat turi sayyohning talablariga qanchalik mos kelishiga qarab ta’tilning umumiy taassurotlari hosil boʻladi. Oziq-ovqatnig qay darajada boʻlishi mamlakat va mehmonxona tasnifiga qarab sezilarlicha farq qilishi mumkin. Odatda mehmonxonalar bir nechta ovqatlanish variantlarini taklif qiladi: toʻliq pansion, yarim pansion, faqat nonushta.
Toʻliq pansion. Ushbu tur kuniga uchta toʻliq ovqatlanishni oʻz ichiga oladi: “shved dasturxoni” asosida nonushta, tushlik va kechki ovqat. Ba’zi restoranlarda bir nechta turli xil menyu variantlari taklif etiladi (masalan, tovuq yoki baliq tanlovi).
Yarim pansion. Odatda nonushta va kechki ovqatdan iborat boʻladi, lekin nonushta va tushlik boʻlishi ham mumkin. Nonushta odatda “shved dasturxoni” sifatida taqdim etiladi, kechki ovqat esa “shved dasturxoni” yoki menyu asosida boʻlishi mumkin.
Faqat nonushta. Ushbu turdagi ovqatlanish bir mahal - ertalab ovqatlanishni oʻz ichiga oladi. Mehmonxonalarda quyidagi nonushta turlari taklif etiladi: kontinental nonushta, to‘liq nonushta, “shved dasturxoni”.
Kontinental nonushta. Ushbu ovqatlanish tizimi ancha sodda. Nonushtaga qahva, choy yoki issiq shokolad, shakar, qaymoq (sut), limon, ba’zi turdagi meva qiyomi, jem yoki asal, non mahsulotlari, sariyogʻ kiradi. Ba’zan kontinental nonushta paytida sayyohlarga kolbasa va pishloq ham taklif etiladi.
Toʻliq nonushta. Ba’zi mamlakatlarda bu nonushta “ingliz nonushtasi” yoki “Amerika nonushtasi” deb nomlanadi. Kontinental nonushtaga oʻxshaydi, lekin menyudagi issiq ovqatlar tufayli toʻyimli hisoblanadi. Nonushtaga shakar, non mahsulotlari, tost, sariyogʻ, jem, asal, murabbo, pishloq, issiq ichimliklar kiradi. Issiq taom odatda omlet yoki qovurilgan tuxum, kolbasa yoki blinchikdan iborat.
“Shved dasturxoni”. Bu nonushtaning eng keng tarqalgan va mashhur turidir. Bu turdagi ovqatlanish sayyohlar orasida eng sevimli hisoblanadi. Bemalol olish imkoniyati boʻlgan oziq-ovqatning keng tanlovi mavjud: siz taklif qilingan va qoʻyilgan narsalardan xohlaganingizni olishingiz mumkin. “Shved dasturxoni” bir necha marta borib, kerakligicha taom olish imkoniyatini anglatadi.
Turistlar orasida mehmonxona taomlarining eng sevimli turi bu barchasini qamrab olgan tizimidir. Ushbu turdagi ovqatlanish asosan kurort mehmonxonalari tomonidan taklif etiladi va bolali oilalar uchun juda qulaydir. An’anaviy nonushta, tushlik va kechki ovqatdan tashqari, ovqatlanish turiga ikkinchi nonushta, ikkinchi tushlik, ikkinchi kechki ovqat, asosiy ovqatlar orasidagi vaqtda engil gazaklar bilan barlarda ovqatlanish kiradi.
82 
